دليل مفصل

اربط أوروك آرت بـ Claude، واستخدم السكيلز

بدون أي برمجة. خلي Claude يصنعلك صور وفيديو وصوت من حسابك، والمساعد يمشي على طريقتك بالسكيلز.

شنو هو MCP؟

MCP طريقة تخلي Claude «يدخل» على أوروك آرت ويستخدمه بدالك. انت تحچي ويا Claude بكلامك العادي، وهو يختار الموديل ويصنع الصورة أو الفيديو، والنتيجة تنحفظ بشغلك بأوروك آرت. الصرف ينحسب من كريدتك نفسه.

الطريقة السهلة: من موقع Claude (5 دقايق)

  1. 1
    افتح موقع Claude من الحاسوب

    ادخل claude.ai وسجّل دخول بحسابك. الربط يصير مرة وحدة، وبعدها يشتغل حتى بتطبيق Claude بالموبايل.

  2. 2
    روح للإعدادات ثم Connectors

    اضغط على اسمك جوه يسار الشاشة، اختار Settings، وبعدين تبويب Connectors.

  3. 3
    اضغط Add custom connector

    تحت القائمة تلكى زر «Add custom connector». اضغطه حتى تضيف أوروك آرت.

  4. 4
    اكتب الاسم والرابط

    الاسم: UrukArt. الرابط انسخه مثل ما هو، وبعدين اضغط Add.

    https://urukart.com/mcp
  5. 5
    اضغط Connect وسجّل بأوروك آرت

    تنفتح صفحة أوروك آرت. سجّل دخول بحسابك (Google أو الإيميل) واضغط «اسمح». هيچ Claude يكدر يصنع من حسابك.

  6. 6
    شغّله بالمحادثة واطلب

    بأي محادثة جديدة، اضغط أيقونة الأدوات (Search and tools) وتأكد UrukArt مفعّل. بعدها اكتب طلبك عادي، مثل: «سوّيلي صورة ملك سومري بإضاءة الغروب».

شنو تكدر تطلب من Claude بعد الربط

  • «سوّيلي صورة إعلان لمطعم مسكوف على دجلة بالليل»
  • «سوّيلي فيديو 5 ثواني لاستكان چاي ينصب الصبح، بموديل Kling»
  • «شكد رصيدي بأوروك آرت؟»
  • «اكتبلي فويس أوفر عراقي لإعلان عطر وسوّيه بصوت رجالي»
  • «شوف آخر 5 شغلات سويتها»

السكيلز: علّم المساعد طريقتك

  1. 1
    شنو هي السكيلز؟

    السكيل تعليمات جاهزة يمشي عليها المساعد بكل طلب: مثل «اكتب إعلان بطريقة معينة» أو «خلي ألوان براندي ثابتة». تكتبها مرة وحدة، وما تحتاج تعيدها كل مرة.

  2. 2
    فعّل السكيلز الرسمية

    ادخل حسابي ثم تبويب «سكيلزي». تلكى 19 سكيل من خبرة ARC، مثل معادلة البرومبت، وكاتب الإعلانات، ومولد الأفكار، وخطة المحتوى، والفويس أوفر العراقي. شغّل اللي تحتاجه بضغطة.

  3. 3
    سوّي سكيل خاص بيك

    بنفس التبويب، اكتب اسم السكيل (مثلاً: إعلانات مطعمي)، واكتب قواعدك: الجمهور، الأسلوب، الألوان، الكلمات اللي ما تريدها. أو ارفع ملف txt أو md. واضغط «احفظ السكيل».

  4. 4
    الذاكرة

    بتبويب «الذاكرة» تكتب معلومات ثابتة عنك: اسم البراند، ألوانك، جمهورك. المساعد يتذكرها بكل محادثة.

  5. 5
    شلون تستخدمها

    ما تحتاج تسوي شي إضافي. المساعد يقرا السكيلز المفعلة كلها (لحد 9,000 حرف) ويطبقها على طلبك، سواء كتبت بالموقع أو من Claude عن طريق MCP.

افتح سكيلزي

للمطورين: الربط بمفتاح

هاي الطريقة لـ Claude Code والتطبيقات اللي تستخدم ملفات إعدادات. إذا تستخدم موقع Claude عادي، الطريقة السهلة فوق تكفيك.

  1. 1
    سوّي مفتاح

    حسابي ثم تبويب «الربط» ثم «سوّي مفتاح جديد». المفتاح يبدي بـ uk_ وينعرض مرة وحدة، فاحفظه بمكان آمن.

  2. 2
    Claude Code (الترمنال)

    الصق الأمر بالترمنال، وبدّل المفتاح بمفتاحك:

    claude mcp add --transport http urukart https://urukart.com/mcp --header "Authorization: Bearer uk_..."
  3. 3
    أي تطبيق يدعم MCP

    ضيف هذا بملف الإعدادات مال التطبيق:

    {
      "mcpServers": {
        "urukart": { "type": "http", "url": "https://urukart.com/mcp", "headers": { "Authorization": "Bearer uk_..." } }
      }
    }

افتح تبويب الربط